Jannat jo mile laake mai Khane me rakh dena

Sunday, May 26, 2013

jannat jo mile laake maiKhaane me.n rakh denaa
qausar mere chhoTe se paimaane me.n rakh denaa
[qausar=river in heaven]

mayyat na merii jaa ke viiraane me.n rakh denaa
paimaano.n me.n dafnaa ke maiKhaane me.n rakh denaa

vo jis se samajh jaaye.n rudaad mere Gam kii
aisaa bhii ko_ii Tukaraa afsaane me.n rakh denaa
[rudaad=story; afsaanaa=tale]

sajdo.n pe naa denaa mujh ko arbaab-e-haram taane
kaabe kaa ko_ii patthar but-Khaane me.n rakh denaa
[arbaab=friends; taane=sarcastic remarks]

"Seemab" ye qudrat kaa adanaa saa karishmaa hai
Khaamosh sii ik bijalii paravaane me.n rakh denaa

[adanaa=small; karishmaa=miracle]